Vótáil Aontas na Mac Léinn in Éirinn chun tacú le comharthaí dátheangacha in ollscoileanna i dTuaisceart Éireann ag comhairle náisiúnta na mac léinn i gColáiste na Tríonóide aréir.
Mhol Clíodhna Ní Dhufaigh, an Leas-Uachtarán don Ghaeilge d’Aontas na Mac Léinn in Éirinn an rún.
I ráiteas ríomhphoist go dtí The University Times, dúirt Ní Dhufaigh go raibh Aontas na Mac Léinn in Éirinn “fíorshásta” go bhfuil síad in ann tacú leis na feachtais ó thuaidh.
Lean sí ar aghaidh, ag rá: “Tá guth amháin láidir anois ag mic léinn ó Thuadh agus táimid ag súil le tuilleadh plé a dhéanamh le heagraíochtaí Gaeilge agus le húdaráis na gcoláistí éagsúla leis an bhfadhb seo a shárú go luath.”
De réir an rúin: “Sainordaíonn an Chomhairle: Leas-Uachtarán don Ghaeilge Aontas na Mac Léinn in Éirinn tacaíocht a thabhairt do mhic léinn ó thuaidh comharthaíocht dhátheangach a lorg ar champas.”
Thacaigh comhairle mac léinn in Ollscoil Uladh le comharthaí dátheangacha i Samhain na bliana seo caite, ach ní cuireadh iad in airde go dtí seo.
Lean an rún ar aghaidh: “Ba cheart go n-oibreoidh an Leas-Uachtarán don Ghaeilge leis na Cumainn Ghaelacha agus Aontais na Mac Léinn brú a chur ar Údaráis an Choláiste comharthaí dátheangacha a chur ar champas le Gaeilge agus Béarla ar mhéid chomhionann.”
Agus é ag labhairt i bhfábhar an rúin, dúirt Andrew McAnallen, Uachtarán Aontas na Mac Léinn in Ollscoil Uladh: “Ní féidir linn talamh slán a dhéanamh den rud seo. Táimid buíoch asaibh as ucht seasamh linn.”
D’aithin an rún an tréaniarracht atá ar siúl ag na cumainn Gaelacha agus ag na haontais mac léinn ó thuaidh agus iad ag feachtasaíocht ar son na gcomharthaí dátheangacha freisin.
Vótáil an chomhairle chun tacaíocht a thabhairt d’fheachtas a lorgaíonn táirgí mhíosta saor in aisce do mhic léinn freisin. Bhí rún eile ag an gcomhairle maidir le stailc cíosa.
Mí ó shin, d’fhógair Sean Kyne maoiniú de luach €1.63 milliún do chúrsaí Gaeilge tríú-leibhéal. Cúpla lá ina dhaidh sin, d’fhógair an Roinn Oideachais go gcuirfear an deontas Gaeltachta ar fáil d’ábhair oidí arís.
